Bebbi Bängg

Basler Schnitzelbängg

Rollaator Röösli 2026

S Fräulein Wipf bi uns im Lamm, mit 104 
goot go schtäggerössle an e Schpringturnier
Rein läuferisch ka sii zwaar nüt bezwägge
aber sy hoggt halt eifach seer gäärn uff em Schtägge

Bi de Züürcher, jeemersnai, sinn daas Mimoose 
daarfsch mit Laubblööser jetz kei Laub me bloose 
Für unsre Minu isch daas schyyns kuum zum Glaube
Är findet, Blööser sött men unbedingt erlaube

Y han e Uffgebott bykoo für d Fraue Nati
Zeerscht ha mer dänggt, son e EM miesst no glatt syy
Jä, nai: als Goalie hänn s my welle, ums Verregge
Hächte Sii ‘mol mit dämm Grüppelgräät in d Egge 

Won y letschti bi go Käffele im Sprüngli
bschtell y eins vo dääne feyne Schoggizüngli 
Ha s in e Fuudiweggli gschteggt - groosses Kino
Daas hett usgsee, Sii, wie Trump und Infantino

Miir sinn z Bsuech gsi im Wysse Huus als Gescht
mit unserer Gruppe ‘Graui Panther Basel Wescht’
Döört han y Ranzepfyffe griegt vom suure Moscht
Kuurz druff aabe schprängts dr ganzi Flüügel Oscht  

Dr Emmanuel im Flugzüg 
- BÄMM - im Schtrytt
hett e Gläpper griegt vo synre Frau Bryschytt
Aber scho glyy hänn sy sich wider guet verschtande
und sinn zämme wie nüt wäär am Pissoir gschtande

D Amerikaaner saage fründlig "naiss tu myyt'sche"
und verklaage d Firma On, wel d Schueh dien kwyytsche
Si, die Noochricht isch für mii im Fall e Gschängg
Y ha immer gmeint, es kwyytsche myni Glängg

Hänn Sy s au scho gschmeggt… 
(schnupper, schnupper)
…froog ich Sii doo schüüch?
Das sinn im Ruedi syni jääsen Unterschlüüch
S letscht Mool gwäsche hett äär die, 
dä Schtinggnomaad
aafangs Summerfeerie im Gaartebaad 

An dr Senioore Tuurmschschpring WM in Tri’escht
mit unserer Gruppe ‘Graui Panther Basel Wescht’
schpring y vom 10 Meeter, göttlig, en Amazoone
Do rieft ein «ATTENZIONE:  Killer Droone» 

Im Darknet, bi miir uff em Computer
kauf y Fään Artiggel vo dr Käller-Suter
Daas Stügg Metall doo: 
(s Röösli zeigt e roschtige alte Droot)
isch im Fall kei wäärtloos Gschlamp
Nai, dasch dr Kaarin iire guete Droot zum Trump

D Firma Nestlé hett iire Chef entloo 
wägen ere heisse amour fou dans le bureau  
Bewyys gits keini, es haig s au niemerts gföttelet 
aber d Schrybtischunterlaag haig koomisch gmöttelet

Do letschti mach y im Schoffegg mit aim e Schmüüsli
No simmer heim zu iim, in sy Winzighüüsli
Bereits am Yygang bin y, s isch nid überdriibe 
mit em Füüdle in dr Düüre schtegge bliibe

Suter Moritz, döMöron Pierre, Herzog Jacques
höggle zämme im Kaffi Gröössewaan, im Fragg  
rauche Zigäärli und gniessen e Cognäcli
bis dr Wäärter kunnt mit iirne drey Zwangsjäggli  

Was mit em Hirni so bassiert, wemme z vyyl griesst
gseesch an dämm, was s Fasnachts Comité beschliesst
Jetz gits en nur no digitaal, dr Rädäbäng
und anschtatt Comité heisst s neu "Cool and the Gäng"