Bebbi Bängg

Basler Schnitzelbägg

Rollaator Röösli 2018

Jetz han y grad dr Frau Cerletti gratuliert
Die hett geschter iiri silbrig Hochzyt gfiehrt
Si schänggt im Maa e Reis nach Südafrika ans Kap
(Ruedi:) Und zer goldige?
(Röösli:) Do hoolt s en wider ab

Jetz kasch im Reisebüro Ligstiehl reserviere
Y blyb zwaar doo, wird aber e Lappen inveschtiere
Iir dängget sicher, y han e Voogel unter em Käppli
Aber zem d Schwooben eergere dunggt my das e Schnäppli

Y han e Graabreed ghalte, üsserscht souverään
für s Fröilein Küng, e groosse Migros Wichtel Fan
„PIEP, PIEP, PIEP, sie liebte diesen Klang
…schaad isch s e 40-Tönner gsi im Ruggwäärtsgang“

Wyter nöördlig, immene Saarg us Brässholzblatte
muess d IKEA iire Firmechef bestatte
Rächts uff dr Syte bambelet no e Scheichen uuse
Erstuunt hett s keine, d Bau-Aaaleitig isch zem Gruuse

Si, dr Berset und dr Trömp hänn aanigsloos
iiri schwaarze Köfferli verwäggslet in Davos
Macht Noordkorea jetz en Aagriff, e spontaane
hänn d Yankee d Schwyzer Illuschtrierte und e Banaane

Wäg all de Junge doo, wo gstumme hänn mit Nai
stryych ich mir 70 Stai me AHV ans Bai
Kei Angscht, mer gseen is denn, es isch bi mir notiert
im näggschte Supermäärt zer Stoosszyt wenn s bressiert

S isch wider "Jöö-Alaarm" in unsrem Basler Zolli
Me ka döört Syydebölle dräffe, glaini tolli
Jä grad do letschti haig me, mit sym runzlig Rüsseli
dr Baschi Dürr gsee zeechele am Pissoir Schüsseli


Do letschti sait mer s Lisbeeth, wo mer delifoniere
sy mag jetz d Kroonjuweele langsaam nümm poliere
Iire Philip, und daas nit eerscht syt em BREXIT
verwäggsli immer mee dr Yygang mit em Exit
 
Ansunschte mache sy s im Böckinghäm jo guet
D Hochzyt vom Härry git döört nomol früsches Bluet
Ich glaub, d Kinder vom Prinz Härry syne Kinder
hänn denn d Oore wider flach an iirne Grinder

500 Jahre Martin Luther
Da feiern Vater, Kind und Mutter
Si, vor Eerger hetts mer glatt s Gebiss verschoobe
Eimool mee die ganzi Stadt voll lut(h)er Schwoobe

Dr Hugh Hefner, dr ex Playboy mit de Bley-Gneu
hett mer 1960 gschriibe, dass är sich uff mi seer freu
Für e kurze Momänt han y dänggt, jo, mit dämm könnti
aber denn han y doch lieber mit em Härry Belafönti

Wäär vom Moorge frieh bis Znacht möcht Fäärnsee gneisse
dä zaalt bald nur no e Stutz pro Daag, hetts gheisse
Mi dunggt amme au dä einti Stutz no z vyyl
kunnt dää vo „Fischer Bettwarefabrik Au-Wädischwil“

Füüdleblutt hogg ich alti Friggadelle
noch em Dusche uff my iPhone, ooni z welle
Mit dr Gsichtserkennig hetts Verwirrig gää:
Bim Uffstoo sait das Gräät: “Bonjour Heer Constantää”

Si, im Aquafit do froggt my son e Doddl
"Gnäädigi Frau, sinn Si en Übergröösse Moddl?"
Sy näggschte Satz verstoot me nur mit Unterthittel
…won er uffwacht ooni Zeen im Uni Spittel

Mir hänn e Picknick gmacht am letschten Älplerfescht
mit unsrer Gruppe Graui Panther Basel-Wescht
Do fliegt vo oobe ab dr Gondle, gopfridstutz
dr Schwingerköönig in my heisse Kaffi Lutz