Bebbi Bängg

Basler Schnitzelbägg

Rollaator Röösli 2022

Dr David Dääge duet - he aber naaai, wie kaame
vor em Ablaufdaatum s Kaader dail-ent-raame
Aber kei Angscht, dr Kaarli blybt bim FCB
Dä isch vollfett und hebt lang, wie UHT

Uff dämm Erinnerigsfotti drait my runde Babbe
vo dr SKA ganz schtolz sy Kunde Kappe
Die glyychi Kappe, die guete Zyte sinn glaub duure
ziehsch hütt am beschte ganz wyt aaben über d Schnuure

70 Joor scho drait s Elisabeeth, dasch eedel
die änglisch Kroone "on her very brittish Shedl"
Dr Kaarli Odermatt dä duet sich au nit schoone
dä hett syt bald scho 70 Joor ein in dr Kroone

Y sag mym Augenaarzt, y bruuch e steerggeri Brülle
 In dr Hoffnig, dass är das Wünschli ka erfülle
Die letschte Gleeser mit so 'mne Schliff, sait dä verdrosse
haig me als NASA Teleskoop in Wältruum gschosse

Dr Bond isch mause. Au dr Böösewicht vo Spectre.
Was kunnt als näägschts? E Züürcher, oder no verreggter?
Jetzt schrybt mer Hollywood, sy wurden uff mii schiile
zem d Seggretäärin, d «Miss Menopausi» schpiile

S Esthi Käller – Si, e keini schafft do gründliger
macht mit Gummi d Drämmlischiine velofründliger
Bim Lukas Ängelbäärger, daas isch leider s Dummi
isch offesichtlig s ganze Rügg-Groot us dämm Gummi

Jetzt bruuchsch dä «Kuu Err Code» nümm für s Zertifikaat
Das isch dää blöödi Duubeschiss doo im Quadraat
Und ich muess wider zrugg in d Migros Klubschuel, hösch
damit y weiss, wien y dä Saich vom Händy lösch

Jetz hett Basel, das isch für d Expäts e Granaate
e moodischs Woonquartier mit Naame ‘Zittigaate’ (Citigate)
In dääre Hipster Siidlig, Si, do kann y froo syy
griesse my alli mit «Hello, Rolleyter Rosie»

An dr Ninja Warrior WM füür Senioore
han y abgruumt, s isch mer gloffe wien e Moore
Und als Trainingsgländ, dä Parcours isch famoos
quääl ich mi jeede Daag zweimol durch d Freye Schtrooss

Bim Karaoke, perfäggt, au optisch, das hammer gschwoore
gib ich im Lamm s Helene Fischer, scho syt Joore
Jetzt isch die blötzlig nümmi schwanger und ich Krokette
gsee no immer us, wie dää uff dr Blagette

Gelalle: He nai, hejo-ejo-ejo-ejo-ejooooo
(Schlugg us em Bierhumpe)
Gelalle: Aha, jäso-eso-eso-eso-esoooooo
(Schlugg us em Bierhumpe)
Y bi am Yiebe, und nit öppen in dr Brunft
damit y s Niveau ha für in e Heere Zumpft

Si, das ABBA Comebäck isch e rächte Schämmer
Uff dr Büüni stön die nur als Hologrämmer
Das heisst, e Huffe Schall und Rauch mit e gli Schubidu
Me kennt das z Basel vo den Esthi Käller Interview

Rächt verlöcheret hänn sy s Miss Maarpeli, my Schweschter
Die hett my z Basel bsuecht, sy woont sunscht in Mancheschter
Jeede Daag, us lutter Gwoonet, sälbschtvergässe
isch die in Doppeldegger Impfbus yynegsässe

Dr Doggter Schyybli, my neue Fachaarzt für Dhromböösli
sait zue mer: «Mache Sy sich doch bitte frey, Frau Röösli»
Dass e Daame nit alles bryysgit, han y aagnoo
Drumm han y s Bändeli vo dr Basler Heerbschtmäss aagloo