Bebbi Bängg

Basler Schnitzelbägg

Rollaator Röösli 2016

Syt Aafang Januar, do ghööre mir zwei
en ere Schnitzelbangg Fabrigg in Oscht-Shanghai
Statt Määlsubbe frässe mer Soyasöössli
(dr Änggelbueb:) Ich heiss jetz „Luedi“
(s Röösli:)…und ich „Lollaatol Löösli“

Dien Si Znacht in Ihrem kalte Schweiss verwache?
Sinn Sy muetloos? Bringt Sy gaar nüt me zem Lache?
Hängt ihre Lääbenswille no ammene dünne Gummeli?
Denn wäärs gscheyter gsi, sy wääre nit ans Drummeli

Als Erhoolig vom bedreute Woohne
stell ich mir voor, my Rollaatoor syg e Droohne
Y Staart im Lamm, dr Flug isch eher knapp
und im Schiefen Egg do stüürz y jewyyls ab

Hütt am Spaalebäärg, y ha jetze no e Schogg
faahrt mer öppis Kalts und Dunggels unt’re Rogg
En alti Frau begrabbsche? …das wird jo immer toller!
No ziehn y d Brüllen aa und gseeh, es isch e Poller

Ich ha zer Abweehr vo so Fummel Attentaat
immer my Finger am Pfäfferspray baraat
Und an dr Burgfälderstrooss isch Anti Brumm s Perfeggte
In dämm Quartier hetts mer eifach z vyyl „in Seggte“

Als Nüüner Grüppli simmer letschti, dasch nit sälte
ins Museum gange vo de Spiilzüg Wälte
Uff em Heimwääg simmer leider nur no acht
S Fröilain Affedranger hett dr Schirm zue gmacht

En alte Schwooben Aarzt hett gschriiben uff sym Bleggli
dr Hitler haigi nur ei Glugger ghaa im Seggli
Wie s lauft wenn beidi Eier fääle weisch derfüür
bi uns in Basel syt dr Waahl vom Baschi Dürr

Letscht Dezämber – es hett im Fall no Blatz ghaa
bin y s Abschiidskonzärt go luege vom Bo Katzmaa
Y ha sy Autogramm verlangt – nit, wil s e Gnuss isch
Nai, y ha s schriftlig welle, das jetzt ändlig Schluss isch

Y han e Star Wars Albdraum jeedi Nacht:
„Doodes-Stäärn Bundesbäärn – d Macht verwacht“
 Mit de Liechtschwäärt gits e wieschts Gestocher
und am Schluss, do gwünnt d Martullo-Blocher

Si:  die VW Tächnigg duet mir imponiere
Die Brieder wüsse, wie d muesch Schaadstoff reduziere
Drumm dängg y, s Bescht wäär für uns alli neume duure
me hänggt em Wessels son e Gräätli voor sy Schnuure


S Vreni vom Lamm stygt in ihre Mustang Ford yy
macht beidi Fänschter aabe und loost Francine Jordi
Wäährend em Faahre griegt sy unverhofft e Schleegli
Sythäär loost sy numme no Beatrice Egli

Me hett Wasser gfunde ooben uff em Mars
und d NASA Naasebääre halte sich für Stars
Also für mii isch dr diräggti Nutze glai
Y ha eehrlig gsait gnueg Wasser in de Bai