Bebbi Bängg

Basler Schnitzelbägg

Rollaator Röösli 2014

Ändlig gnueg gspaart, han y dänggt…Kumm, loss es grache!
Bi denn zem Bijoutier die Brilliant-Ring do lo mache
Und jetzt eerscht schryybe miir die Coop Bangg Galööri
Y haigi d Konto-Uszüüg griegt vom Gigi Öri

In dr Staine zaigt e Schwoob uff my Blaggedde:
„Ach guck mal an, da sitzt ein Schlumpf auf der Toilette“
Ich saag em „Danggschöön, dä Kommentaar isch intelligänt
und jetzt faahr ab, de bassisch nümm ins Kontingänt“

Uff ere Kaffifaahrt noch gfüühlte dryzääh Stunde
hämmir in Züüri ändlig e deggte Paarggblatz gfunde
Do glopft s an d Schyybe und so-n e Typ sait zue mer: „Mai,…
...machsch s oohni Gummi, Muetter, zaahl y hundert Stai“

Won y mit em Rollaator ha dr Spaalebäärg ab welle
gooht my Brämsi nit: Arrivederci, Friggadelle!
Und won y zem Stillstand kumm uff dr Hööchi vom Restaurant Schnaabel
gseehn y Rumääne seggle mit myne Kupferkaabel

Uff dämm Helge doo gseehn Sii d Familie Duck
Rächts hämmer s Roothuus, wyter hinde wäär denn d Brugg
Die dralli Änte linggs isch übrigens nit dr Dagobäärt
Nai, dasch dr Minu, dä füüdelet do über e Määrt

Die alti Gaischterbaahn isch zrugg, obwoohl sy roschtet
Die vo Herzoog und Dömöron hätt vermuetlig zue vyyl koschtet
D Faahrt isch holpprig, d Statischte blaich und d Luft isch gammlig
Also äähnlig, wie an ere Fümoar Versammlig

S Frölein Grööfli, us em Altersheim zum Lamm
Hütt Moorge gyggst die blötzlig schrill, wie s 6-er Dramm
Alli sinn gsegglet: Schugger, Äärzt, Füürweehrkommando
Y ha no gsait: bstell keini Fingge bim Zalando

Uff em Vitaparcours - ich trainier döört myni Schaiche
kunnt mer e Rootfuchs ganz gruusig unter d Spaiche
Und Zoobe im Fäärnseeh – Si, do bin y denn verschrogge
gseehnen uff em Grind vo dr Steffi Buchli hogge

Mit em Ueli Steck bin y durch e Himalaya duure
Fascht grieg y von ere Hoorde Sherpas ains uff d Schnuure
Wel am Mount Everest, noch zirka duusig Meeter
kheyt son e Tibeeter….über my Katheeter

Voorigi Wuche lueg y wider emol Telebasel
Do kunnt dr Wessels mit sym Verkeehrs- und Bau-Gefaasel
Und won är so "schnetterlet", sy Müüüüli spitzt und verzellt
dängg y: Super, ha-n y s Höörgräätli abgstellt

My näggschte Ehemaa, sicher dien Sy my verstooh
suech ich uff „www. Akadeemiker & Singles mit Niveau“
Döörts hetts zwaar vyyli gschläggti Sieche und jungi Strääber
Aber weenigschtens triff y nit dr Eric Wääber

Uff em Moped faahre dr Hollande et sa Chérie
am Sunntigmoorge amme gäärn in d Boulangerie
Uff em Ruggwääg sait denn sy Mademoiselle kokett
„Alors, y hoff, daas wo so druggt, isch nur s Baguette“

Y ha my Daarm lo spiegle im Bruederholzspidaal
Also, y saag ene, y ha Näärve bruucht, wie Staahl
Döggter hett s kaini me - s duet jetzt e Frau Zbinde vo dr Kantyyne
wo sunscht Berliiner füllt die Rööhrli hinden yyne

s Rollaator Röösli isch dr Schwiigerdrache vo:
www.diegroobschlaechtige.ch