Bebbi Bängg

Basler Schnitzelbägg

Rollaator Röösli 2019

Y bi dr Burgener go bsueche für e Bricht
für my Kolumne in dr Zytschrift Spoort statt Gicht
"Ich bin der König von Kalkutta…!" hett er gsait
denn hänn s en zrugg in syni Gummizälle drait

Das hämmer guet gmacht mit dämm Nai zu dr Spitaalfusioon
Jä, Si, y loss doch an my Hallux kei so Buure Gloon
Als Patiäntin muess y s Uni Spittel loobe
Us Qualitäätsgründ operiere döört nur Schwoobe

S Vreni, die Zwätschge, schwimmt Joor yy, Joor us dr Rhyy durab
Letschte Heerbscht, bi diefem Peegelschtand, do wird s rächt knapp
Mit iihrem Buuse, wie immer ooni z dängge
blybt sy amm’ne moorsche Veloständer hängge

Noch 60 Joor schliesst s Kino Mascotte syni Halle
Unsrem Heer Böggli hett s drotz Membercard nümm gfalle
Är sait, kuum haig er amme ändlig afo stoo
syg nundefaane scho bereits dr Abspann koo

Dr Brinz Philip, voor sym Unfall, höört me saage
haig in d Hoose pfludderet und sich überschlaage
Do meint s Beethli: "Daas duet is not amus-e!
S Glyyche macht er amme wemmer zämme schmuuse"

Zwüsche Wuurzegraaber und em Alt Wartegg
frogt mi e Schwoob: "Isch des d‘Ruine von Dornegg?"
Vyyli Baizer gseen das weeniger verbisse
Solang s Lokaal no stoot, wird döört dr Gascht abgrisse

In dr Migros Clubschuel isch mer ein bassiert:
Ha my Gebiss rasch uff dämm Schtuel doo deponiert
D Frau Brofässer hoggd druff ab, es isch zem Schysse
Und scho kunnt d BaZ und schrybt, dass d Schieler d Leerer bysse

Dä alti Helge zeigt mi knuschprig, schöön und jung
Y bi Schwyzermeischtere gsi im Schtaabhoochsprung
Dangg mim Könne wotts s au hütt no amme glinge
zem die hooche Trottoirrändli überschpringe

Jetz goot denn Fesseheim bald zue, daas isch famoos
Jä, dr Franzoos, dää schrybt Securité halt grooss
Nur no zwei Joor, s ka nüt bassiere, avec garantie
Wie guet daas klappt, gseesch an dr Linie 3 uff St. Louis

Y ha mer d Tschender Theoryy mol lo erklääre
vo dr Servierdochder doo im Schwaarze Bääre
Zwei Schtund hetts duurt, no han y denn begriffe,
dass sy Ueli heisst und meischtens schtoot bim Schiffe

D Kyneese landen uff um Moond, und zwoor im Dunggle
Wel im Dunggle losst sich schyyns am beschte munggle
Dr Bresidänt, dr SchySsi Ping, schloot uff e Gong
und scho eröffnet döört dr eerschti Mr. Wong

Y glaub, dr Wessels hett woorschyyns e bitz e Schwalbe
Jetz wott dä Pflaschterstai verleege in dr Dalbe
Kommissioone mit em Rollaator? Dangge, Nei
Do laufsch mit Vollmilch loos und kunnsch mit Angge hei