Bebbi Bängg

Basler Schnitzelbägg

Rollaator Röösli 2020

Es hänn in Kynaa e baar flyssigi Kyneese grampft
und e Granggehuus in fünf Dääg us em Boode gschtampft
Die wänn au s Basler Häärzschtügg baue, nit grad hütte zwoor
S bruucht e halbe Daag; sy schlön dr Donnschtigmoorge voor  

Y liis im Hürryet, dr Nationaalroot Atici,
söll e Verbündete vo bööse Terrorischte syy
Es git vom Wiehnachtsmäärt e Filmli, wird behauptet
wo dä schyyns ganz brutaal e Grättimaa enthauptet

Mit em “Jöörg” Douglas, s isch en Abschiid gsi, e schwääre
schtiirbt vo mir e wyt'ri Hollywood Affääre
Y hoff, y wird, das fäänd y ämmel rächt beschisse
nit au so blötzlig us dr Blieti vo mym Lääbe grisse

Das was sy gseen doo, halb verfuult und gryydewyyss
das isch my Schwooger, Brokurischt bi Credit Suisse
Syt Aafang Joor (y ha die Brieder uff dr Latte)
sag y dääne scho beschtatte, nit beschatte

30 Millioone Abschiidsbonus, brovisoorisch
kassiert dr Thiam und bedanggt sich uff Ivoorisch:
"Okuno-mame, Aliki-liki Bono M'bappe!"
Y bi s go guugle, s heisst: Tschüss und blooset mer in d Kappe

Y ha dr minu droffe - han is s scho verzellt?
Är sait, är haig die silbrig Federer Münze bschtellt
und für sy Sammlig no e letschte Wunsch, e holde:
dass er em Roger d Hintersyte daarf vergolde

Duet e Pfropfe s Bluet verschtopfe, ka s guet syy  
dass s Hirni lyydet, d Fachfrau nennt das Embolie
Isch s Hirni hii, wirdsch blitzt und bisch am Handy no
heisst das nümmi Embolie – dasch Embolo  

Ze sym Geburtsdaag, das syg seer maskulin
wünscht sich dr Ruedi für uff d Schtroos und mit Benzin
öppis wo Läärm macht und wo fäggt, wien e Bischtoole
Jä, Si, dä Laub-Blööser, dä gang em gäärn go hoole

Ganzi 120 Duusig, Nundefaane
zaalt ein z Miami an dr Art für e Banaane
Wenn bi uns Banaane glääbe an dr Wand
denn weisch, s wird näggschtens wider gwäält im Basel-Land

Y kauf em Ruedi, dä sammlet billigi Mannsgöggeli
 ammen e Kinder-Ei, d Schaalen isch us Schöggeli
In jeedem sibte steggt us PVC e Häppy Hippo
und für Noschtalgiker e CVP Lombardi Filippo  

Si, my Änggelbueb, dr Ruedi, dasch e Glatte
Wenn ich em saag, mach säll, mach daas, denn sait er „What the…?!“
Y weiss zwaar nit, was äär will saage, mit dämm „What the…?!“
Aber das „What the…?!“ han y grausaam uff dr Latte !!!

Uff ere Kaffifaart mit Halt in Lieschtel oobe
gseen y, am Huusbäärg hänggt e Faane vo de Schwoobe
Si, zer Sicherheit, y ha dr Laag nit draut
han y im Ängel  "Eisbein" bstellt "mit Sauerkraut"

Vo de Museums-Sache dien zwei Drittel do
irgendneume umme stoo...und kein weiss wo
Jetzt bringt denn d Ackermaa e Blaan, sott me do meine
Aber die stoot irgendneume umme...wo weiss keine

Dr Brofääser Loodemaa, my Fachaarzt us Berlin
sait, ich haig weenig Micro-Blaschtigg im Uryyn
Derfüür vyyl Holz im Daarm, dasch äärnscht noch sym Ermässe
Y sott mee Acht gää, wenn s Fleischvöögel git zem Ässe

Hütt isch die alt Frau Doggter Stöggli ammer duure ghuscht
Anstatt mer d Hand z gää, git sy mer e "Gängschter Fuscht"
Zeerscht han y dänggt, jetzt isch das Beeri nümm ganz dicht
Aber sy hett gsait, es goot nit anderscht wäg dr Gicht