Bebbi Bängg

Basler Schnitzelbägg

Rollaator Röösli 2023

Der Schyssi Ping isch wider emol am Lätsche
Dä blöödi Joe, dä blöödi, isch sy Ballöönli go verdätsche
Und us de Trümmerdail wird s Pentagon nit schlauer
Es schmeggt schyyns alles nur noch Chicken Sweet&Sour

S Aromat wird knapp, das find y krass
Jo, vor allem für my Handel uff dr Gass
Mit waas stregg y im Verkauf jetz die baar Gramm
won y bezieeh daarf in dämm Kiffer Tescht Brogramm?

Z Argentyynie, Caramba Buenos Diaz
hänn sy e liebe Gott und au no e Messias
Sogaar im Vatikaan, y sag s jetz e gly schroffer
paggt der Schwoob no voor em Argentyynier d Koffer

So langsaam han y d Hoffmann La Roche uff der Latte
Im groossen Umgrais hett s verdelli nur no Schatte
Und im Dieerli Laade empfiilt mer son e Staggeli  
 «Kaufe sy lieber grad e Muulwurf, statt e Daggeli«

Bi de Village People frogt sich in der Taat
muess dr Winnetou jetz zrugg in s Reservaat?
Unsere Minu wäär eeh besser für die Bäänd  
in der Paraaderolle, als Old Schnäpperhänd

Wenn y bsoffe bi – Jä, Si, dasch s A und O  
nimm y s Taxi und loss der Rollaator schtoo
Nur wenn s mer kötzerig isch - do duure bin y suuber
loss y s Taxi us… und bschtell derfüür en Uber  

Är isch e Schnäppli gsi, my neue Ring am Finger
Wobyy, so langsaam glaub y, s isch en Unglüggsbringer
Y ha böbberlet an s Glaas, s macht BÄNG – e Duschi
und ganz Berlin frisst graatis vierzää Dääg lang Sushi

Myy Bruder z Londe, dr Corporal Rollayytor Joe
hänn sy no wäärend dr Beäärdigung vo dr Queen entloo
Bi de Salutschüss, 96, kasch se zelle
hett dä Duubel uff Seryyfüür welle schtelle

Y muess saage, s isch mer pyynlig naime duure
My Gebiss, das kheyt mer ständig us dr Schnuure
Dr Ruedi filzt mer myni Haftgreem, die Banaane
und gläbbt sich fescht dermit uff den Autibaane

Dr Ruedi sait, sy Schuel, die haig dr Schtroom abgschalte
No mee unterbeliechtet hätt y nit für mööglig ghalte
Ych han e Schtroomschpaarlöösig, wo Euch alli wägg haut
Und zwaar…….. Ojeemynee, jetzt han y grad e Bläckout

In dr Sauna frogt my eini – lyycht e Faissi  
öb ych en Aanig haig, was «Woke Beweegig» haissi
Y han ‘re gsait, die Definitioon isch zimmlig schlicht:
Wenn sich dy «Woog» beweggt isch s wäg em Übergwicht