Bebbi BänggBasler Schnitzelbägg |
|
Rollaator Röösli 2024
Gmääss Bundesroot daarfsch d Nääme wider dopple
schprich ‘Baume’ an ‘Schneider’ und ‘Käller’ an ‘Sutter’ kopple
Dä toll Entscheid kunnt für s Lisbeth Schneider-Schneiter
e gli z schpoot uff dr Karrieere Leiter… leider
Dr Groossi Root, y möcht niemerts do beleidige
duet sich im Summer amme schweer mit den Entscheidige
Dr André Auderset, sy Grind so root, wie Lava
schwanggt z Mallorca zwüsch’ em Rioja und em Cava
Dr Joe Biden uff dr Büüni z Colorado
fliegt uff d Schnuure, wien e Stäggli bim Mikado
Si, aber glandet isch dä wie uff weiche Hot Dogs
Jo, kei Wunder …. mit dr Schnuure voller Bottox
D Rollaator Stones sinn zrugg, mit em Mick Jagger
Dä hett mer grad no gfäält, dä wieschti alti Schlägger
Syt sächzig Joor scho das Gezappel und Gehangel
E klaare Fall vo «Sex and Drögs and Fachkreftemangel»
Dr Rooti Kaater in dr Wääbergass, em Rhyy aa
hänn sy gschlosse, mitsamt Entsafteria
Y ha d Schtange hei gnoo, dääglig haart trainiert
und soo my Füüdle in e Pfiirsig transformiert
Zwüscheväärs Ruedi:
E bsoffene Matroos us de Niiderlande
sait, ich syg in dämm Lokaal entschtande
Jetzt isch au s Mascotte Kino zue, s isch nit zem Fasse
My glaine Ruedi hett döört d Leer gmacht – an dr Kasse
Y bi an d Dernière gange und sag s offe:
Leider isch nit alles ryybigsloos verloffe
Es kunnt e Mäldig vom ‘Eländ’ Musk sym Satellit:
«Mutter Erde schwer getroffen, Meteorit!»
Do rieft en Ingenieur, «Jä heilige Jacobus,
das isch kei Kraater - nai, dasch d Gruebe döört bim Globus!»
S Tanja Grandits, Si, die han y uff dr Latte
bykunnt en Eehre-Spaalebäärgler Boodeblatte
Em David Dääge, dämm unverschämmte Seggel
gänn sy höggschtens no en alte Doole Deggel
In dr Staine, wenn y kei Stutz ha für in s Stucki
friss y bald frittierti Hiehner us Kenntucky
Dr Doggter Iseli, my Huusaarzt, sait was nützi
syg voor em Dessert schon e zweiti Fettwäggschprützi
Jetzt bringt Mattel - nai loos, es isch zem Gruuse
uff e Summer e Rollaator Barbie uuse
Sy hänn s Bikini fix montiert bis zu de Schaiche
us Angscht, es schletzt ‘re d Nippel zwüsche d Schpaiche
Das mit dämm Ungeziifer z Frankryych isch rächt myys
Alli hänn Wanze döört am Ranze in Paris
Wobyy bi miir, am Fasnachtsdonnschtig in de Moorgeschtunde
han y eerlig gsait im Näscht scho seer vyyl Schlimmers gfunde
Si, die Fäärnsee Schproocherkennig isch e Schrott
Won y d Käller-Sutter an dr Olma luege wott
und saag «Säuli schtryychle» …. jä, Si, eson e Scheiss
stellt s Gräätli um uff Bachelor in Paradise
Dr Rubiales z Schpannie hänn sy schmuuuus-schpendiert
Si, son e Faux-pas isch im Kaarli nie bassiert
Dä hett Abschtand gnoo bi miir, trotz dr Extaase !!
Guet, Hand uff s Häärz, das hett au z due kaa mit dr Naase