Bebbi Bängg

Basler Schnitzelbägg

Rollaator Röösli 2025

Do letschti han y zue mer gsait: suech e Romanze
Nimm dr vo Wattewyl, mit dämm kasch ummeschwanze
Si, bi dämm Brueder nütze nid emol K.O. Dropfe
Dämm sy Schnuure muess me separaat K.O. glopfe

Im neue Rialto Hallebaad, fascht um e Hoor
hätt y ins Wasser pfludderet wääg all dämm Chloor
Mit ’me Gwaltsschwumm ha my grettet, do frogt e Schponti
öp ich die jünger Schweschter syg vom Noè Ponti

Mit dääne Schtäärbekapsle: jeee, Si… daas Tamtam!
Miir hänn e Broobeliige kaa bi uns im Lamm
Wäg mym Atoombuuse grieg ich dummi Kueh
dä blöödi Deggel vo dr Kapsle gaar nid zue

Miir sinn an d Notre Dame Eröffnig greist als Gescht
mit unserer Gruppe ‘Graui Panther Basel-Wescht’
Mit em Rollaator schtand y bugglig... quaasi soo doo
Do hett ein gfrogt "Jä sinn jetz Sii dä Quasimodo?"

Wenn Si e Japan Kääfer gseen, dasch schuurig wichtig
mien Sy dä mälde: daas isch mäldepflichtig!
My letschte Japan Kääfer, s duet sich zwaar nid zieme
isch vom’ne Judo Leerer gsi mit schwaarzem Rieme  

Mi frogt e Grufti, öp y Schpeer wiirf oder fächti
My linggen Aarm haig vyyl mee Mussggle als dr rächti
«Mit linggs, do ryss y», sag y dämm Schoofseggeli
«ab de Blastiggfläschli die verfluechte Deggeli»

Judihui: s isch ändlig ESC im Mai
mit vyyl Räägebööge, Pink und Dai-di-dai
Miir duet dr Ruedi laid, die glaini Wundergugge
Dä aarmi Siech gedraut sich jetz scho nümmi z bugge

Sii, jetz han y also, hösch, schwäär e Froog:
Was saage Sii zu dääre Wöschbääre Bloog?
Kuum schtellsch dr Grümpel uuse, kömme sy, die Allesfrässer
Jä, s blybt kuum me öppis üübrig so für d Elsässer