Bebbi BänggBasler Schnitzelbägg |
|
Dipflischysser 2014
Im Mickey Mouse Heftli s letschte Joor
kunnt ziemlig vyyl vo Basel vor
dr Morin fählt dasch dr Fluech
dä basst besser in e Globibuech
Uff dr Autibahn isch e Bagger ko
und die halbi Brugg isch nimme do
hett Egge ab und Schruube lugg
sie haisst jetzt Hanspi Wessels Brugg
Jetzt fiehrt me d Gschlächterquote y
jedi dritti Person muess wyblig sy
am Glaibaslerfyyrtig nadyrlig au
dr Gryff, dr Lai und die wildi Frau
Wenn d Fraue schreie isch bigoscht
s Zalando Päggli ko per Boscht
schreits denn wyter so ibertryybe
isch dr Böschtler die ganz Nacht blyybe
An dr Fuessball WM z Brasilie mai
hetts au Samba-Girls mit lange Bai
dr Shakiri maint i mach e Wett
dass es nyt in mynere Greesi hett
E Buur ledig lyttet em Färnseh a
die Steffi Buchli mecht y ha
mit iire Frisure wurd y sage
kas mer d Veegel vom Fäld verjage
In so Garageboxe mit eme Dach
kemme d Huere z Ziri rasch zer Sach
und d Kunde kenne dehai denn sage
I ha in d Garage miesse mit em Wage
Nimmsch d Regierig vo Baselland
Aktuelli und Alti mitenand
hesch uff em Bild mit dääne Dotteli
zwanzig Joor Kischte uff em Foteli
S Bundesgricht maint dasch nit rächt
däm Carlos goots in dr Kischte schlächt
ohni Ferie und Thaiboxe das muesch seh
kennts uss däm none Eric Weber geh
Koscht d Schwizer Vignette hundert Stai
hänn Schwobe gsait blibe sie dehai
jetzt blyybts bi vierzig Stai wie gwohnt
derbi hätt sich do dä Uffschlag glohnt
Dr Obama froggt was heer y do
e Nilpfärd z Europa im e Zoo
nai sait dr Ghaimdienscht sie heere grad
d Frau Merkel nimmt e Fango-Bad
In de Züg nämme si ungeniert
Sitzplätz uuse, hänn Stange montiert
aber fir dä Briis wo zahlsch fir s Ganze
miesste Kätzli an dr Stange danze
Me sott alle vo dr BVB
e gross Panini Album geh
dert kläbt me voller Poesie
Bildli vom blutte Diräggter y
Mer hänn is gfroggt was soll denn das
nach jedem Goal frisst dr Salah Gras
er hett syy Wäggsel so yglaitet
und sich uff s änglisch Ässe vorberaitet
Jede Obe dien mer bätte
liebe Gott syg doch e Nätte
gib im FCB dr Säge
und erlös is vo de Dääge
Baustelle-Liedli (e Buurebiebli…)
Jedi Wuche goots vo neyem los
immer in ere andere Stroos
me sperrt zerscht ab denn risst me uff
in dr ganze Stadt e Riesebuff
und mir fahre mool linggs mool rächts
mool uffe mool abe mool linggs mool rächts
mool fire mool hindre mool linggs mool rächts
mool uffe mool abe mool linggs mool rächts
Baustelle z Basel meege mer nit
wells in Basel vyyl z vyyl git
machet sofort alli Lecher zue
Teer druff gheie denn isch Rueh
denn fahre mir nimme linggs nimm rächts
nimm uffe nimm abe nimm linggs nimm rächts
nimm fire nimm hindre nimm linggs nimm rächts
denn fahre mer wieder graduss