Bebbi BänggBasler Schnitzelbägg |
|
Dipflischysser 2017
Wotsch ebbis verschigge, no gits bigoscht
A oder B oder gar kai Boscht
bi gar kai Boscht wirds extrem schwär
wo griegsch fir das e Margge här
Wo dr Fidel Castro hett miesse go
isch uss em Sarg e Räuchli ko
sy letschti Havanna, hänn mer iberlait
nai, au s Samsung Handy hett adie gsait
Grootet e Grille gege ihre Wille
uff e Grill und de bisch am grille
duets d Grille grille dasch brutal
doch Insekte frässe isch jetzt legal
Worum neyi Kampfjet fir d Armee
die alte sinn super, das hett me gseh
grad hett ain, so wird brichtet
in St. Moritz e gfährlig Sail vernichtet
Vo Häfelfinge bis Wintersinge
isch dr Storch go Buschi bringe
wenn sie so im Schilf uss wohne
kunnts in Zuekunft mit ere Drohne
Me blaant fir dä Veloring dä tolli
e Velobrüggli iber e Zolli
duesch bi Glattys driber fahre
ka dr Zolli s Laiefueter spare
E Spray dä zaigt im Fuessball a
vo wo me Freistoss schiesse ka
e Strich in dr Wäbergass zaigt a
wo dr Freier stoosse ka
E Million fir s Dramm, dasch nit normal
schiggt dr Wessels de Waggis illegal
fir so viel Schmiirgäld ka me saage
wird uss em Dreier e Waggiswaage
Es git Kaffi to go und Raclette to go
Sandwich to go und Blueme to go
Wasser to go und Alpkääs to go
und im Roothuus gits Wessels to go
Mir hänn dr Grossmamme s U-Abo
ney als Gschängg uffs Handy do
jetzt hetts sie gsait mer spinne e bitz
bim Entwärte basst s Handy nit in Schlitz
Statt im Joggeli, dasch Baselstadt
findet s Knächtewürge z Prattele statt
well dr Schwingverband so finanziell
dä arm Bärgkanton unterstütze well
Wo dr Putin bim Trump dr PC haggt
hett die hooli Biire s Händy paggt
wenn d nit uff heersch, ganz im Vertraue
loss i um Russland e Muure baue
Dr Heusler sait es goot nimm lang
denn tritt i zrugg in zwaite Rang
Rang zwai dr Bärnhard, denn blibt ney
beschtefalls fir YB no Rang drey
D Heidi Mück das Superstück
hett bi de Wahle gar kai Glück
d Regierig die blybt muggefrei
me hett dr Baschi gwählt als Muggespray