Bebbi BänggBasler Schnitzelbägg |
|
Dipflischysser 2015
Unsri Fraue wänn uns fir d Fasnacht je
zwanzig Frangge Sagggäld ge
jetzt mache mir politisch Drugg
und wiise das Budget sofort zrugg
Däm Kakitani vom FCB
hänn sie gly e Ibername geh
nur deents im Sturm e bitz zem lache
wenn Pipi und Kaki Gool mien mache
Mir leen d Hose aabe und denn klick
e sogenannts Selfie vom beschte Stigg
me seht nyt schribt s Hedi, ihr zwai Alte
miend halt z Nacht dr Blitz ischalte
Kuum glandet uff em Komet Tschuri
isch dr Akku läär, was me sehr beduuri
zäh Joor fliege fir so ne Furz
und denn isch s Verlengrigskabel z kurz
Für den Fall des Falles im AKW
hett me is Jodtablette geh
gits mit Solar e gross Problem
griegsch no ne Tube Sunnecrem
Me glaubts fascht nit, dass das ka sy
vom Baschi Dürr trifft e Selfie y
vyyll blutti Hutt doch mer schnuufe uff
sisch nur e Dail vo dr Glatze druff
D Metzger bschysse immer me
drum hänn sogar am OSZE
x-dausig Schugger, sisch nit zem lache
miesse so ne Kerry-Wurscht bewache
So ne U-Bahn z Basel wär dr Wahn
dr Wessels hett scho lang e Plan
är grabt und schuuflet das isch s Tolle
in dr ganze Stadt Entlüftigsstolle
In dr Tagesschau machts zägg
und d Cornelia Boesch isch wägg
bim Schwizer Färnseh wirds immer nätter
jetzt kunnt dr Tatort vor em Wätter
Lachendi Gsichter dien vor de Wahle
vo de Plakatwänd abe strahle
und dr ganzi Körper unde dra
kasch via Handy als Selfie ha
D Albaner sinn Stolz uff ihr Heimatland
zeige Doppeladler mit gryzter Hand
sehr stolz sinn au die vo Baselland
ihr Zaiche isch die hohli Hand
Am e guete Daag do kas es geh
kasch vom Roche Turm obe Ziri seh
sehsch au no Zircher denn isch gly
dä gueti Daag au scho verby
E wyter Selfie hänn mer do
vo dääre Conchita Wurscht biko
nur hänn mer noni uuse gfunde
isch d Foti vo obe oder unde
D Helene Fischer macht atemlos
ihre Körper in Latex isch famos
an de Konzärt liggt uf jedem Platz
fir alli Männer e Gaiferlatz
Dr Schaggi im Zwaier muess d Laitstell ha
mi grifft im Fiehrerstand e Mugge a
dr Guschti funggt uss Weil, dasch jo toll
mi Achter isch mit Schwobekäfer voll
Quelle: Youtube Kanal der Tageswoche