Bebbi BänggBasler Schnitzelbägg |
|
Dipflischysser 2016
D Goldblaggedde hett bim yyne ko
gseh, s hett au Baselbieter do
lueg wie sie duet am Ranze hange
iire isch dr Lade abe gange
Grexit, Konkurs vo Griecheland
Blexit, Konkurs vo Baselland
nur ka me sage die arme Grieche
sinn wenigschtens no glatti Sieche
Mir dräffe an dr Extasia
s Heidi ohni Gaisslepeter a
s hett d Glaider vergässe und liggt do
denn isch zem Gligg dr Schälleursli ko
Dr Playboy finde mer nimme gail
zaigt Fraue nur no mit Oberdail
mir zwai finde das e Saich
dasch wie Fasnacht ohni Morgestraich
Fir dr Mörgeli, dä isch nimme do
sinn Martullo und Köppel ko
toll dass dr Wähler wähle ka
zwische Pest und Cholera
Dangg singe uff eme Video
hett d SVP me Lyt bikoh
friehner, wär sich erinnere ka
hänn d Rattefänger Flöte gha
Poller stoppe jede Kaare
wo will dr Spalebärg ab faare
ganz guet fände mir, es hätt
fir d Velofahrer Nagelbrätt
Lueg dr James Bond und dr Wessels a
dr Bond isch dä wo alles ka
und sy Martiny gschittlet wott
dr Wessels dä wo me schittle sott
Duesch no Ziebelwaye im Drämmli stoh
und muesch denn aine fahre lo
saisch Entschuldigung, das hilft enorm
dasch no unter dr VW Abgasnorm
Bi Telebasel wird alles ney
bim Umbau sait dr Gipser Frey
ka ebber d Tamara Wernli hoole
die mien mer no spachtle und ney moole
E Priester z Rom dä sait ganz kuul
y ha e Frynd denn ych bi schwul
d Kirche hett ihn suschpendiert
d Frau vom Pabscht haig reklamiert
D Fatima, d Aisha und d Emine
bade in de Glaider im Eglisee
und motze alli denn im Chor
d Wösch wird nit suuber und stinggt nach Chlor
Würscht sinn schädlig sait d WHO
uff jedi Wurscht soll e Schoggbild ko
e Bild vom Morin wär dr Hit
nur Wurscht uff Wurscht goot laider nit
Bi dr Billag zahle alli mit
ob e Grät benutzisch oder nit
mir wänn Kindergäld und zwar gnue
mir hänn kaini aber s Grät derzue