Bebbi BänggBasler Schnitzelbägg |
|
Dipflischysser 2018
We are singing now for you
with a Banjo and Pictures too
„Dot Shiter“ is the name of the Band
„dasch Wältkultur“ you understand
Fir e unerwinscht Buschi, dasch brutal
hetts e Buschiklappe im Spital
wenn denn d AHV nimm zahle ka
gits e Senioreklappe näbedra
D EU will Gäld und das nit z knapp
drum schläggt dr Junker d Leuthard ab
die richtig Antwort wär fir dä
e Schutt in Arsch vom Constantin
Statt Granggekasse zahle wo viel koschte
dien mer lieber dääglig e iphone boschte
s haisst doch immer, dasch nit ney
an apple a day keeps the doctor away
Wenn me dr Ackermann e Tipp darf gäh
sie sott sich dr Roger als Vorbild näh
er gwinnt Satz um Satz, uff jedem Platz
sie sta… staggelet scho im erschte Satz
Er holt d Rageete fiire dr Kim Jong Bum
well in Südkorea haig me drum
uff de Olympiapischte wird em brichtet
alli Schneekanone nach Norde grichtet
Hänn sie im Glas no e Räschteli Wy
s kunnt grad ebber und sammlets y
kippts in e Fläsche, alles mitenand
s git Staatswy fir s arme Baselland
Elteregspräch geen z Lieschtel so
dr Lehrer losst Schieler und Eltere ko
git ene d Hand, erklärt dr Nutze
denn dien sie zämme s Schuelhuus butze
Vom Härsteller drifft e Warnig y
Gift soll in de Matraze sy
bi Martullo Blochers basst me uff
aber dert liggt s Gift jo obe druff
Gracias Matti, Delgado olé
fir die tolle Spiel bim FCB
jetzt muesch nur no, sig bitte so guet
em Wessels zaige, wie me zrugg drätte duet
Unsri Grossmamme die vo Laufe
will Gäld verdiene und Bitcoin kaufe
Computer und Handy haig sie zwar nit
sie nämms inere grosse Däsche mit
Dr Hüppi sait, woner bim Färnseh goot
ich gib eych do e guete Root
zahlet witer Billag und ich schängg alle
e Saison Chärtli vom FC Sangg Galle
Hett dä Helgemooler z viil gsoffe gha
ass er nimm in dr Mitti moole ka
nai, rieft dä ganz hässig dry
das sott dr europäisch Rächtsrutsch sy
Zerscht Drammussfall, denn Zugussfall
do griegsch als Pändler Hoorussfall
e Schtund uffs Drämmli warte miesse
um s Lääbe in volle Züge z gniesse
S duet s Gsicht erkenne, das iphone Zäh
de muesch kai passwort me ygäh
hesch d Larve a, machts aber schlapp
uff em Display stoot, zieh d Burka ab
„Mir hätte gärn e Stange“ hänn mer gsait
das hett d Källnerin gar nit vertrait
„me too“ hett sie gschraue, die spinnt e bitz
bschtell bi dääre nie e Apérol Spritz