Bebbi BänggBasler Schnitzelbägg |
|
Dipflischysser 2022
Mer sage dr Masggepflicht ade
scheen eyri Gsichter wieder z gseh
mit Kläbband sott mes aane griege
alli Ohre wieder hindere z biege
E Kueh luegt die Freyheitstrychler a
worum mien die zwai Glogge ha?
d Kueh näbe dra erklärts spontan
so markiert me die mit Rinderwahn
De froggsch di well de nimm sicher bisch
ob dä Däge no ganz hundert isch
schynts hett er die hundert no binenand
nur d Raihefolg isch durenand
D Dramschiine griege im Minimum
wäg de Velofahrer e Gummi drum
gheisch glych uff e Sagg, isch s Guete derby
dr Gummi soll schynts gfühlsächt sy
Engelberger und Berset sinn immer z Zwait
well dr Luki em Alain sy Däsche drait
dr Engelbärger isch eso
zu nere tragende Rolle ko
Wo dr Wolf so umme zieht
kunnt er au ins Baselbiet
sait aber gly, das kasch vergässe
die schmegge komisch, die kasch nit frässe
Nach vierzig Joor kunnt ABBA zrugg
jetzt kemme andri unter Drugg
in Memphis hett sich ganz verreggt
dr Grabstai vom Elvis scho bewegt
D Swisscom setzt voll uff 5G
3G hett dr Berset welle seh
und d Susi maint fir mi isch guet
wenn ain dr G-Punggt finde duet
Bim Schwizer Färnseh ischs eso
wär no laufe ka, dä lauft dervo
dr Letscht lescht s Liecht, ihr wärdets seh
sisch dr Bettware Fischer vom Zirisee
D Merkel sait zem Olaf Scholz
mach jo nit d Raute, dasch mi Stolz
vo dr Grössi här, sotte dir do
aber alli mini Deux Piece go
Dä hoch Benzinbriis isch e Bloog
mit unsrem Budget kunnt immer d Froog
Schatz machsch dr bitte no Gedangge
wämmer z Obe go ässe oder go tangge
E QR Code bruchsch hitt iberall
zu jeder Zyt und in jedem Fall
drum wärs sicher au no guet
wenn me dä usswändig lehre duet
Bi dr Raiffyyse Bangg hett dä Maa
syni Nase iberall dinne gha
aber d Spese vom Vincenz ditte druff hi
im Rotliecht ischs nit numme d Nase gsi
Z Australie froggt ain was er mache soll
er haig e ungspritzte Serb am Zoll
bim teschte haig me zwische de Ohre
Im grosse Hohlruum s Stäbli verlore
Helene Fischer sag uns gschwind
wie kunnsch denn du, zu däm Kind
ganz aifach, Achtung fertig los
und denn e Nacht lang atemlos