Bebbi BänggBasler Schnitzelbägg |
|
Dipflischysser 2019
D Doris Leuthard hett bim Ruggtritt gmaint
ein Auge lacht und eines weint
dr Schneider-Ammann git sich do glööst
ein Auge schläft, das andere dööst
D Helene Fischer mit neyem Hängscht im Stall
dr Silberiise isch jetzt Altmetall
d Beatrice Egli wär no frei, im Fall
das wär denn aber Schwäärmetall
Fahrt dr Wessels iber Bsetzistai
und schittlets en duure bis dehai
no pfifft und singt er ganz elai
sie mache mi gail die Bsetzistai
Am Säggsilitte isch es Sitte
um e Bögg wird umme gritte
mer sinn falsch schreit ain, haltet a
dasch nit dr Böög, dasch d Ackermaa
D Mässehalle fluete wär nit dumm
s gäb e prima Oceanium
und d Uhremäss findet, dasch doch glatt
in dr Delifonkabine am Barfi statt
Mir hänn d Adela gfroggt, d Bachelorette
worum sie uns nit ussgwäält hett
lueget doch eyri Larve a
mi Maa muess e richtig Schnäbeli ha
Dr Basler Bolizey, oh jeh
hett me Batterieauteli geh
die fahre so lyyslig, sisch nit zem lache
dass d Schugger dinn mien brum, brum mache
D Negro soll, das wär d Idee
e grosses M als Logo neh
und statt als Negro Rhygass z laufe
sich aifach Migros Räbgass daufe
In Frankrych seht dr Macron rot
wenns um die gääle Weschte goot
mir sehn rot und dien duure gheie
wenn gääli Weschte, Hopp YB schreie
D Fuessballer hänn so BH montiert
jede glaine Schritt wird registriert
bim FCB hätt me sichs lieber gschänggt
well e reine Bewegigsmälder länggt
D Eigernordwand schaffe mer in vier Schtund und au am Matterhorn goots rund
jetzt trainiere mer an de stailschte Wänd
fir die hoche Basler Trottoirränd
Zitrone nimmsch wägem Vitamin Ce
dr Lachs dergege hett viel De
und wägem Yysemangel nit vergässe
dien unsri Drämmli d Schiene frässe
Well dr Burgener so guet änglisch ka
littet er de Frinde z Indie a
we close the Muttenzerkurve, you understäänd
you can make there e indisch Restauräänt
Kunnsch usser Plan vo dr Gschäftsrais hai
und d Frau dehai isch nit elai
no isch dä Blutt im Kaschte definitiv
sicher kai Versicherigsdetektiv
D Goma isch gschtorbe, alli sinn baff
jetzt suecht dr Zolli e neye Aff
es syg jede willkomme, daile sie mit
nur dr Donald Trump dä wänn sie nit