Bebbi BänggBasler Schnitzelbängg |
|
Dipflischysser 2026
Am WEF sinn wichtigi Lyt derby
e paar lade sich amme sälber y
dr Sarkozy hett gfählt, hoffnigslos
sy Fuessketti längt nit bis Davos
In Blitzbums drugge mir im Fall
dur s Quartier immer voll uffs Gaspedal
lieber hundert Stutz als Buess abschrybe
als e Viertelstund, in däm Kaff miesse blybe
D Putzfrau im wysse Huus duet motze
ständig Bsuech uss dr Schwiz, sisch zem kotze
vor allem dä Infantino macht Drägg
däm syni Schliimspur griegi fascht nit wäg
Dr FCB, uns hetts fascht gschellt
hett Mittelstürmer online bschtellt
was er hätt beachte selle
Qualität duesch nit bi TEMU bschtelle
Bim FCB ischs gly sowyt
denn schuttet er vor hundert Lyt
me darfsch lutt neyer Vorschrift do
im Tabällekäller nit iine lo
Wo sie z Basel s franzesisch teschte
sinn mer saggschwach, nit die Beschte
sisch schwierig gsi, witer vorne z lande
d Schieler hänn d Frooge uff ditsch nit verstande
Dr Trump hett orali Inkontinänz
und chronisch venösi Insuffiziänz
das heisst aifach gsait naime duure
schlächt duurbluetet und immer dumm schnuure
Wo mir bim Doggter s Granggekärtli gänn
well sie d Date elektronisch wänn
sait d Assistäntin und luegt sträng
do druff isch nur dr Rädäbäng
E haisse Tipp gänn mer ihne
hogge sie vor d Wöschmaschine
drugge Sparprogramm und lehre druss
so seht d Zuekunft vom Schwizer Färnseh uss
Wenn sie im Drämmli, do gheisch duure
am Händy iber Darmspieglig schnuure
und das in vierzig Sproche nämmli
wotsch nur no Karaoke-Drämmli
Mir hänn im neye Globus dr Globi gsuecht
niene gfunde, vor is aane gfluecht
alli Globi haige, dasch no witzig
e baar Hüüser witer Grossrootsitzig
Jede Daag im Färnseh, kuum stellsch en a
sehsch dä orangschi Gloon uss Amerika
mit hänn e Leesig gfunde mit KI
s bländet dr Bettware-Fischer y
Sit dääre Fuessball EM so ne Quatsch
geen unsri Fraue jetzt an Matsch
mir luege dehai, dasch e digge
nur am Donnschdig nit, denn hänn mer Strigge
D Auti stoppt me mit de neye
Poller obe an dr Freye
fir Velo, Trotti, ecetera
sotts Nagelbrätter und Fangnetz ha