Dipflischysser 2020

Bi däm starke Sturm sinn d Stroose läär
nur ain im Trainer segglet hi und häär
ka mer ebber d Händynummere geh
so ne Sturm bruche mir bim FCB

Mir sinn mit eme Achtzger knapp
uff so Trotti dr Spalebärg durab
jetzt hänn mer verdeggel e Uffgebot
well uns s VBS als Kampfjet wott

Wenn jetzt alli, statt mit em Karre
e-Bike oder Trotti fahre
löst sich sicher, wenn au extrem
ganz elai das Ränteproblem

Am Frauestraigg sinn mir oh jeh
vo Baiz zu Baiz aine go neh
nach em zähnte Bier hänn mir denn mai
au no Klimanotstand gha dehai

Hett dr Trump hoch Fieber waiss me gly
das ka nie dä Corona Virus sy
nit wäg sim harte Grind uss Holz
au e Kyneese-Virus hett sy Stolz

Fertiggricht gits bi de Griene
uss Iberzigig sicher niene
d SVP hett, das isch s Gröschti
jetzt aber pletzlig Fertig-Röschti

Dr HD Läppli sait ai, ai, ai
ai, ai, ai sage au mir Zwai
e ai, ai, ai, gits obe druff
dr Hamppe Wessels heert ändlig uff

Dr Wessels maint, y sag gly good bye
nimm denn d Glammere vom Hosebai
verbrenn die bleede Velosache
und ka ändlig d Autipriefig mache

Sportlerin vom Joor, rennt wie gschpunne
hett an dr WM Medallie gwunne
drum kenne mir d Lyt nit verdraage
wo Mochita Kramblunschli falsch sage

Me hett d Idee, dass es besser goot
mit Niin statt Siebe im Bundesroot
au fir d Gschlächterquote sigs ideal
drey Fraue, drey Männer und drey neutral

Em Bethli gheit d Krone vor Wuet in Tee
Harry, i muess dr dini Titel neh
in dr Royal Army bisch nimme Flieger
du bisch e Änggeltriggbetrieger

Wenn Hailigi kenne iber Wasser go
worum hetts Klimagretli e Schiffli gno
sicher isch sicher dailt sie mit
ohni Sääge vom Pabscht getrau mi nit

Do isch d Laitstell vo dr BVB
hänn sie irgend naime e Schofför gseh
wenn nit mien sie e Billije kaufe
und denn vo Haltstell zu Haltstell laufe

E Spitzbueb mit Maitlibai näbedra
lueg emool gnauer e Schwöbli a
e Berliner z fille isch e Sauerei
es isch scho pervers in dr Beggerey