Bebbi BänggBasler Schnitzelbägg |
|
Dipflischysser 2025
E Züüghüsler littet ins Bundeshuus a
er miess d Privatadrässe vo dr Amhärd ha
me well ere ebbis nochschigge lo
die bstellte Kampfjet sige ko
Es littet, dr Santiglaus stoot do
friehner isch er duur s Kemmi ko
jetzt isch fertig mit däm Trigg
fir d Wärmepumpi isch er z digg
Dr Biden hett s Wysse Huus verloh
d Büromöbel em Trump iberloh
do bättlet e Stuehl bitte nimm mi mit
e sone grosse Arsch vertrag i nit
Wenn das mit Spare so witer goot
ischs bim Schwizer Färnseh pletzlig z spoot
denn moderiert als Supergau
dr Bettware-Fischer d Tagesschau
Unser Gartehiisli, dasch diggi Boscht
hett Millione me als Budget koscht
die Stararchiteggte, mir hänns gaahnt
dr Herzog vo Delémont hetts blaant
Syne Gägner duets grausam stingge
wägem Shaqiri sym lingge Fingge
au Högge schloot er wie ne Haas
und maischtens sehn sen nit im Gras
In Ziri hetts fir e Böög z viel Wind
in Heide verliert er denn dr Grind
stellet doch das wäär nit dumm
vo Kremation uff Ärdbestattig um
D Olympiade z Paris isch verby
die näggscht muess im Glaibasel sy
vom Claraplatz bis zur Dreirose
sehsch alli Natione in Trainerhose
Als Adängge an Olympia
kasch z Paris so dyyri Fläschli ha
wos Wasser vo dr Seine dinn hett
sie nenne s dert Eau de Toilette
Bi dr Vorussschaidig zem ESC
hetts fir uns e Nuller geh
geniale Uffdritt, alles schreyt
denn sinn mer ab däm Täller gheyt
Wo d Martullo Blocher in dr "Arena" bällt
und gaiferet, hetts bi uns gschällt
mir hänn doch grad glääse im Amtsblatt dinn
dass in Ziri, Rottweiler verbote sinn
In Dubai-Schoggi bisst e Sultan iine
und maint, do fähle d Sultanyne
aber dr glunge Gout do verreggi
kunnt vo miner alte Kamelhoor-Deggi