Käller-Assle 2014

Menü:
»Käller-Assle
»2019
»2018
»2017
»2016
»2015
»2014

Fasnacht 2014, 25 Joor underwägs

Sie ich find das ganz toll Spitze,
dass sie alle heute do innen sitze.
Ich begrüsse jeden do vo Härze
und wär nymm deerf koo, kaa ych verschmärze.

Dr Holland rieft: "Lueg Berlusconi!"
"My Bunga Bunga, Schnäggli isch nit ooni"
Druff maint dr Silvio „Mir duet schyne,
dini isch so alt wie drei vo myne!"

Im Stadttheater, s isch e Hoon,
gseesch gueti Schauspiiler mit schlächtem Loon.
Wär in dr Bolitigg verkeert
wais im Baselbiet isch s umgekeert.

Will s Gäld fir s Altershaim nit längt
het sich das Groosi letschti dänggt.
Ych versool jetzt ain, das kennt sich loone.
Wie bim Carlos gits Sagggäld und gratis woone.

S dritt Kind bikunt dr Federer gly.
Und holt bald dr Hakan Yakin y.
Dr Underschiid aber wais mr gnau.
Bim Rodscher sind alli vo dr glyyche Frau.

D Angie Merkel, ych sag s jetzt barsch,
hauts bim Langlauf uff e Arsch.
S Tamara Wernli kennt das nit,
will s bi yyre kai Arsch zem Lande git.

Dä Baumgartner vo dr BVB
kennt mer doch als Bachelor nee.
De Fraue schänggt dä denn statt Roose,
e Fotti vo sich, ooni Hoose.

D Alice Schwarzer, dä Männerschregg,
het Schwarzgäld in dr Schwyz versteggt.
S gieng um glyychi Rächt vo Maa und Frau
was dä Hoeness macht, will sie gfelligscht au.

Dr Prinz Charles dä muult gnärvt umme:
„S will mi kain as Keenig, was mach ych numme?
Dr Obama maint: „Kumm zu uns, mach kai Mischt.
Mit so Oore wirsch Abheerspezialischt.“

Im Frielig isch d Naase voll Polle wo fliege.
Im Summer kasch Asthma vom Fyynstaub griege.
Im Herbscht bikunsch Hueschte und jetzt offebar,
im Winter vo dr FIFA e Fuessball-Kat(h)ar

So e Schwoobe Bischof isch wild am baue,
und duet fir sy „Hyysli“ Millione versaue.
So wie z Basel grad baut wird, dängg ych pauschal,
wird dr Wessles vom Baudep. bald Kardinal.

Ych ha welle uff Tribüne hogge.
"Do isch bsetzt!" sait aine drogge.
Ych ha gfrogt "Und dr Blatz drnäbe?"
„Dä au, dert hoggt dr ander Dääge.“

Vo Basel aabe bis nach Klote,
verlange d Fraue nach ere Quote.
Doch uff dr Blaggedde gseesch es gly,
goots um s Butze sind sy nymm drby.