Käller-Assle 2016

Menü:
»Käller-Assle
»2019
»2018
»2017
»2016
»2015
»2014

Fasnacht 2016, 27 Joor underwägs

Vyl Negativs, s isch laider woor,
isch bassiert im letschte Joor.
Positiv, dängg ych fir mi,
sind nur Dopingtescht vo de Russe gsi.

Dr Pabscht Franziskus maint zu Gott,
das är sy Schtell im Himmel wott.
Do maint dä, dass das so nit lauft.
Dä Blatz het scho dr Blatter kauft.

D Fetz isch wiider im Schtänderoot.
Deert schtoot si halt so lang s no goot.
Isch si denn z alt zem schtoo isch s tolle.
Kasch si aifach im Rollschtuel use rolle.

Dr Zirkus Knie muess d Mäss verloo.
Är soll ney bim Sankt Jakob schtoo.
Als Ort wär s Roothuus au ganz scheen.
Deert hets scho jetzt Kamel und Gleen.

D Bundesrootswaal isch barat.
Und alles hofft uff e Sprängkandidat.
Doch es duet e kaine gee,
will dä hoggt no z Winterthur in dr Moschee.

Wiirscht, sind bees, han ych vernoo.
Lääbensgfäärlig, sait d WHO.
Prompt gits jetzt, das find ych krass,
Wurschtsalat bi dr Dignitas.

S Baselbiet frogt mit eme Lache:
«Was wurdi d Stadt au ooni uns mache?»
Vorschleeg in so Situatione
han ych vyli und zwar achtzig Millione!

Dr Chris von Rohr, dä Krokus Rocker,
griegt e Aagebot, das haut en vom Hogger.
Als Wäärbeykoone will mr iin nee,
Mit sym Slogan "Meh Dräck" und zwar fir VW.

Was mache au die Fraue doo,
wo bim Bachelor mien haime goo?
S glyych wie vorhär, ganz ooni Gspass,
die schteen wiider uff dr Wäbergass.

Die haillige drei Keenig, die luege ins All.
E riisige Schtärn lychtet hell yber em Schtall.
Doo maint dr Kaspar: «Ych finds ibertriibe.
Iberall Wärbig fir Star Wars Dail siibe.»

D Boscht bringt mir e Pagg verby.
Drinn isch e Vibrator, das deerf doch nit sy!?
Ych ha no befürchtet, s kunnt nyt gscheits uuse,
bschtellsch e Selfie-Stick bi dr Beate Uhse.

Ych haa jetzt au so Hoose aa,
wie z Frankrych dr Stan Wrawinka.
Die hälfe bim Suffe, denn hesch ain im Gool
luegsch druff und s isch dr vor Schregg wiider wool.

Das wo do gääl am Boode liigi.
Schiins e Fuessgängerschtraife siigi.
S beruhigt mi han ych das erfaare.
Ha scho gemaint me heig dr Embolo yberfaare.

Uff em Fuessballfäld dien sich bewege,
zwai Teams wo mitenand Mundart rede.
Das bassiert, und isch kai Witz,
spielt an dr Euro Albanie gege d Schwyz.

Bim White Dinner, das isch nit glooge,
bin ych nach 10 Minute use gflooge.
So wild wie ych iss sind halt persee
Tomateschpagetti e schlächti Idee.

Vo vorne dien si heftig drugge.
Vo hinde schtoosts dr au in Rugge.
Spyyrsch zwische de Bai denn noo e Hand,
denn isch Silveschter im Schwoobeland.

In Schaare flichte si zu de Germaane.
So vyli waisch nimme wo mit ne aane.
Mit Sagg und Pagg, s Chaos isch nimme z schtoppe,
wenn am Samschdig d Basler in Weil geen go shoppe.