Bebbi BänggBasler Schnitzelbägg |
|
Käller-Assle 2019
30 Joor underwägs
Mir wänn jetzte fir eych singe
und eych unsri Värsli bringe.
Doch bevor mir d Helge bräsentiere,
mien dr unsri Cookies aggzeptiere!
D Negro Rhygass selle joo
e neys Logo iiberkoo.
Damit me nimme Schtryt bykunnt
isch s e wysses Männli uff wyssem Grund.
Ooni Brofyyl und Luft im Rad
faart aim d BVB duur d Stadt.
Das basst ze de Cheffe, denn wie dää Bus
hän die kai Brofyyl und d Luft isch duss.
Bim Ribery schtoot uff em Disch
e riise Steak wo vergoldet isch.
Bi dr Mässleitig Basel, am Apéro,
duesch numme Goldfischli bikoo.
D Britte hänn vor kurzem joo
s Väärb “to brexit” in d Sprooch uffgnoo.
“to brexit” haisst uff dytsch, s isch soo,
adie saage und denn nit goo.
De Leerer goots grad bitz verschisse.
Die wäärde voo de Schieler bisse.
Kai Wunder hänn die deert soo Soorge
loot me d Kinder uuse ooni Zmoorge.
Dr Kübelböck het fertig gsunge
und isch iiber d Reeling gschprunge.
Jetzt dängg ych so fir mii: „Hey Digge,
diend dr Erdogan uff e Gryzfaart schigge“.
Im Detail, es isch joo glaar,
isch die Blaggedde ganz wunderbar.
Doch vo wytem isch es ainerlei,
gseet die uss wie e 3 Minute Ai.
D Basler Schugger hän jetzt joo
Elektroauti iiberkoo.
Dr Gfreiti Meier isch am flueche.
Dää isch syt Schtunde am Tanggdeggel sueche.
D Frau Adler sait zu iirem Maa:
„Schatz ych mecht gäärn Jungi haa.“
Dää meint: “Aber Zwilling ligge nid drin,
well Doppeladler broblematisch sin.“
Die Kunscht-Blaneete gseen toll uss
und lychte hell bim Waisehuus.
Als Ort micht s Roothuus vyyl mee Sinn
well si deert joo nid die hellschte sin.
Dr Galacchi, dää seit gschwind:
„Im Grossroot gits weder Buschi no Kind!“
Doo froog ych mii wie das denn goot
sitzt dr Thüring noo im grosse Root.
Turischte bsueche, soo will s mir schyyne,
in de Feerie gäärn Ruine.
In däm Sinn kennts jo per se
fir d MUBA e zwaiti Chance gee.
Dr Doggter sait zem Trump: „Ojee,
ych ka iine kaini Dablette gee.
Es isch halt soo, ych will nid liege,
as Arschlecher numme Zäpfli griege.“