Bebbi BänggBasler Schnitzelbägg |
|
Käller-Assle 2017
Fasnacht 2017, 28 Joor underwägs
So e neyi Toleranzzoone
han y dehai wo ych due woone.
Denn bin ych brav, suff nid umenand,
isch mini Frau mit mir tolerant.
S 2016, s isch laider woor,
fir Musiker e ganz schlächts Joor.
Vyl sind gstorbe, me frogt sich was goot.
Nur d Rolling Stones die griegsch nid doot.
Ych gsee uff em Barfi, in dr Nacht,
e Horror Gloon wo deiflisch lacht.
Do mergg ych e Fääler, ych kaa nyt drfür,
s isch nur s Waalplakat vom Baschi Dürr.
E Bier fir Ziircher muess jetzt aane
Ueli Forte isch dr Naame
Jo so ebbis liggt scho dinn
Zaigts as Ziircher alles Fläsche sin
Noo de Waale z Amerika
Lytet dr Gilbert Gress em Trump grad aa:
«Ych gratulier und mir duet schyyne
dy Coiffeur isch dr glyych wie myne»
E mängem duet do d Leuthard laid
wäge dene Löcher in iirem Glaid.
Das bassiert duesch halt per se
Stoff vo Schwyzer Fuessballtrikot nee.
Obwool sich ainigi beschwere,
d Muslim mien jetzt schwimme leere.
Dä Entscheid macht gar kai Gspass.
Wärde doch im Wasser d Bombe nass.
Es maint dr Hampe doo zem Gilles:
«Dä Veloring, dä koschtet z vyl! »
«Und schlimmschte», maint dr Gilles zem Hampe,
«trotz Millione muesch no sälber drampe.»
Si kemme vom Oschte und Afrika.
Vom Norde und Südamerika.
Und wenn die em Balle noche renne
duet sich das FC-Basel nenne.
Äääm, äääm, ebbe, äääm öööm äääm.
Joo halt ääääm, denn äääm, ööm äääm.
Das Äääm gheersch ständig, s macht mi muff,
macht d Sibel Arslan d Schnuure uff.
Mit some Velo fir dr Transport
raast unsere Opi vo Ort zu Ort.
Gheit är uff d Schnuure und stirbt drby
hett är wenigschtens Kischte grad drby
D Frau Peng us China luegt verdrosse.
Sii het das Fondue gar nid gnosse.
Lieber hätt sie e baar Nudeli
mit eme fritierte Pudeli.
D Ackermaa im Regierigs-Raige
Deerf politisch d Zeen jetzt zaige.
Iiri Schnuure muess me loobe.
30 Zeen und alli oobe.