Bebbi BänggBasler Schnitzelbägg |
|
Käller-Assle 2015
Fasnacht 2015, 26 Joor underwägs
Je nach däm was als Bangg duesch singe,
haisst s schnäll: „Dä Väärs dä derfsch nit bringe!“
Doch ych loo mir daas nit vermassle.
Humoor isch frey. „Je suis Käller-Assle!“
E bitzli schiebe und denn no drugge.
Ooni vyyl Graft liggt daas Schiff uff em Rugge.
Wie daas bassiert isch, kaan ych nit verstoo,
dä Kapitän isch doch nit uss Italie koo.
D OSZE duet sich verbarrikadiere.
D Bolizey duet Gitter inschtalliere.
Im Glaibasel dänggt me sich nyt drbyy.
Dert isch scho mänge hinter Gitter gsi.
Dr Geri Müller, dängg ych fir mi,
isch letscht Joor die grescht Skandalnuudle gsi.
Doch luegt me sini Naggt-Selfies aa
merksch die greschti Nuudle duet dä nid haa.
Myny Hamschter dehai, s sich unerheert.
Die graabe und loche im Keefig wie gsteert.
E besunders verbissene isch drbyy.
Ych nenn dä liebevoll Wesseli.
Dr FC Luzäärn isch ganz dief unde.
Drum hän mir fir dä e neye Drääner gfunde.
S isch d Natascha Kampusch, nit ooni Grund.
Die weiss wie me uss em Käller kunnt.
Ych ha d Joddablette uff em Disch vergässe
und mi Katz hett die ganzi Paggig gfrässe.
Jetzt redet die Hochdytsch, hebt kuum no dr Latz.
Daas bewyyst, daas Jod isch ächt fir d Katz!
Dä Leffelbieger, dr Geller Uri,
isch gege mi e blasse Schnuuri.
Ych ha broblemloos, daas isch nit glooge,
my iPhone säggs im Sagg verbooge.
Mir Basler sind so richtig glasse
und dien in kaini Schublaade basse.
Doch bim Eric Wäber wurd ych s begriesse
me kennt die Schublade drotzdäm schliesse.
S isch dragisch und me verstoots nur schwäär
Sinn d Schublaade do druff laider läär.
Daas kunnt drvoo, ych muess es saage,
wenn d Blagedde duesch verkeert umme draage.
Stoosch uff Blondine wo häärzig reede?
Denn mach doch Ferie im scheene Schweede!
Bisch scharf uff haissi Hyener us Poole?
Muesch z Chur e Schwyzer Grill Poulet hoole.
Ych ha miesse däm Obama schryybe.
„Dini schussgaile Schugger diens ächt ibertryybe.“
Sini Antwort isch kurz und het mi verdrosse.
„S Obligatorische wird bi uns anderscht gschosse.“
Mit em achter Dramm, ych find daas gail,
faarsch zu de Schwoobe bis nach Weil.
Und an dr Gränze, daas isch s tolle,
duet duur s Drämmli s Dutyfree Wäägeli rolle.
Dr Guy Morin dä duet sich draue.
Will z Basel-Ost jetzt drotzdäm baue.
Alles glaini Hyyser ooni spitzigs Dach.
Wie si Bolitigg, aifach numme flach.
In minere Partei, daas isch dr bescht.
Gits wie in Zug e Wienachtsfescht.
Doch leider han ych nit kenne goo.
Ych ha kaini KO Drepfli me bikoo.
Alles schreyt lut: „Gopferdeggel,
was sell dä Hitler uff de Kaffiraam-Deggel?
Mir isch s egal und steert mi kuum.
Ych dringg mi Kaffi nit schwarz sondern bruun.
Daas Männli wo me doo druff seet.
Isch e Karikatur vo mene Brofeet.
Ych hoff, sott ain jetzt s Gweer go hoole,
är schiesst so schlächt, wie ych due moole.