Bebbi BänggBasler Schnitzelbägg |
|
Käller-Assle 2018
Fasnacht 2018
29 Joor underwägs
Bligg linggs, Bligg rächts, e Warnruef, denn renne.
E Hächtsprung, e Rolle, jetz numme nid penne.
Immer dää Stress, denn so goots mr nämmli
bin y am Baanhof und mecht gärn uff s Drämmli.
Dr Schwoob dää wäält halt was äär maag.
Jetzt isch d AFD im Bundesdaag.
Das bassiert halt in däm Land
fyllsch dr Zeedel uss mit dr rächte Hand.
Zu Olympia derfe d Russe joo
numme ooni Faane koo.
Dasch nit so schlimm wie mängge glaubt
denn d Vodka Faane isch noo erlaubt.
Verstaubti alti Glaidersache
Was soll me au mit dääne mache?
D Ackerma das kaa me saage
duet si aifach wyter draage.
Mergge sii s? Es isch ganz still.
E Gnuss wo jede ganz gäärn will.
Scho isch s verby, ych find s ächt bitter,
jetzt goot äär wiider, em Trump sy Twitter.
Bruuch ych Rue, will meditiere
gang ych in d Stüggi go schpaziere.
Doch in Zuekunft, dängg ych fir mii,
kennt d Basel World no ruhiger sii.
Ob d Adela Smajic schutte kaa
goot nur iire Babbe ebbis aa.
Au s Wätter isch mir bi iire schnurz
Hauptsach d Reggli blyybe kurz.
Bolitisch korräggt, kaa me doo gsee,
duet s jetzt e Muslim Barbie gee.
E Badglaid duet nit zum Umfang gheere
Die muess joo au nid schwimme leere.
Dr Babscht sait z Rom am Mittagsdisch:
„Ych gang ane woo s Eländ am greeschte isch.“
Jetzt han y gheert me hett en perse
im Büro vom Hampe Wessels gsee.
Ziiri isch toll und aifach glatt.
Isch in dr Schwyz die scheenschti Stadt.
Ziircher sind gscheit und voll Esprit.
Und dasch e Väärs mit Fake News gsii.
D BVB die duet nid spaare
und loot uns jetzt ins Elsass faare.
Ych froog mi by dääre neie Schlaufe:
„Kaan y s Billje ächt mit Cümlüs kaufe?“
Mit Schämpis, Schmugg, Designer Sache
kaasch bi de Gritte nymme Yydrugg mache.
E Luxus Gschängg wo guet duet basse,
zaal iine aifach d Granggekasse.
Dr Kim Jong-un, dää veruggti Kopf,
schreit: „Ych haa dr Finger uff em Gnopf!“
Wenn äär dää druggt, au nur ganz gnapp,
denn goot Boscht aber wirgglig ab!